Футзал бўйича Ўзбекистон аёллар терма жамоаси Эронда илк ўртоқлик учрашувини ўтказди.

Бош мураббий Аваз Максумов қўл остидаги футзал бўйича аёллар терма жамоаси 16-23 ноябрь кунлари ўқув-машғулот йиғинини ўтказиш мақсадида Эронга жўнаб кетган эди. 18 ноябрь куни Максумов шогирдлари футзал бўйича Эрон аёллар терма жамоасига қарши майдонга тушиб, 2:7 ҳисобида имкониятни бой берди. Ўзбекистонлик футзалчи қизлар Эрон терма жамоасига қарши яна иккита ўртоқлик учрашувида майдонга тушишади.

Ўзбекистон терма жамоаси бош мураббийи Аваз Максумовнинг сўзларига кўра, ўзбекистонлик футзалчи қизлар «катта футболдан сўнг футзалга кўникиши қийин бўляпти».

«Лекин бу баҳона эмас. Дастлабки ўйинда биз Эрон терма жамоасининг кучли ва заиф томонларини яхшилаб ўрганиб олдик. Навбатдаги ўйинларда айнан шу ўрганганларимиз орқали устунликни ўз томонимизга оғдиришга ҳаракат қиламиз», - дейди футзал бўйича Ўзбекистон аёллар терма жамоаси бош мураббийи.

Қайд этиш жоиз, футзал бўйича Эрон аёллар терма жамоаси – катта футбол жамоаларида ҳам тўп сурадиган ўзбекистонлик футзалчи қизлардан фарқли ўлароқ – фақат футзал ўйнайди ва халқаро мусобақаларда мунтазам иштирок этиб келади. Жумладан, апрель ойида Баҳрайнда 8 жамоа иштирокида ўтказилган мусобақада эронлик қизлар 1-, май ойида эса Россияда ўтказилган мусобақада 3-ўринни қўлга киритишган (мусобақада, Эрондан ташқари, Россия, Португалия ва Венгрия терма жамоалари иштирок этган). Бундан ташқари, футзал бўйича Эрон аёллар терма жамоаси 2012 йилнинг декабрь ойида ташкиллаштириладиган 3-норасмий жаҳон чемпионатида ҳам иштирок этади. Ушбу мусобақада, Эрондан ташқари, Бразилия, Испания, Украина, Португалия, Россия, Венесуэла, Япония, Малайзия терма жамоалари иштирок этишади).

Футзал бўйича Ўзбекистон аёллар терма жамоаси таркиби