«Манчестер Юнайтед»нинг 25 ёшли футболчиси Аксель Туанзебе 2022/23 йилги мавсум якунланганидан сўнг жамоани тарк этганди ва ҳозирда эркин агент ҳисобланади.
Туанзебе ўтган мавсумнинг иккинчи ярмини Чемпионшипнинг «Сток Сити» жамоасида ижарада ўтказди, аммо ҳимоячининг Стаффордширдаги ўйинлари жароҳатлар туфайли жуда ёмон кечди.
Марказий ҳимоячи иккинчи даврада атиги тўрт марта майдонга тушди, футболчининг сўнгги тўлиқ ўйини 18 март куни «Норвич Сити»га қарши бўлиб ўтганди.
The Mirror хабарига кўра, Туанзебе Премьер-лига футболида яна бир имкониятга эга бўлиши мумкин, унинг хизматларига яқинда лигага кўтарилган «Лутон Таун» қизиқиш билдирмоқда.
