Пойтахтимиздаги Ўзбекистон тасвирий санъат галереясида шахмат бўйича ўтказилаётган ФИДЕ Ган-При турнирида бугун иккинчи тур баҳслари бўлиб ўтди.
Ушбу турда ҳамюртимиз, жаҳонннг 17-чемпиони Рустам Қосимжонов оқ доналарда украиналик Руслан Пономаревга қарши дона сурди. Иккинчи кун бўлиб ўтган баҳсларда айнан мазкур жуфтлик биринчи бўлиб матчни якунлашди. 26-юришга келиб томонлар муроса йўлини танлашди ва шу тариқа ҳар икки спортчи ҳисобидаги очколар сони ҳам 1 тага етди.
Эслатиб ўтамиз, биринчи турда Рустам Қосимжонов (қора доналарда) озарбойжонлик Шаҳриёр Мамадяров билан, Руслан Пономарев (оқ доналарда) эса хитойлик Ванг Хао билан дуранг натижани қайд этишган эди.
Учинчи турда Рустам Қосимжонов кубалик Леньер Домингес Перес билан куч синашади. Биринчи турда россиялик Сергей Карякинга имкониятни бой берган Ленъер Домингес Перес бугун хитойлик Ванг Хао билан ўйинда дурангга эришди.
Иккинчи турда ҳам оқ доналарда ўйнаган россиялик Александр Морозевич италиялик Фабиано Каруано билан кечган матчда ҳам ғалабага эришиб, юз фоизлик натижа билан турнир жадвалида якка пешқадам бўлиб олди.
Биринчи турда Морозевичга имкониятни бой берган Гата Камский (АҚШ) бу сафар россиялик Сергей Карякин билан бўлган ўйинда дурангга имзо чекди.
Мусобақанинг иккинчи куни, шунингдек, Петер Леко (Венгрия) – Шаҳриёр Мамадяров (Озарбойжон) билан, Петер Свидлер (Россия) эса Борис Гелъфанд (Исроил) билан дуранг натижани қайд этишди.
Иккинчи тур ўйинларининг якунларига кўра Александр Морозевич 2 очко билан биринчи ўринни эгаллаб турган бўлса, 1,5 очко жамғарган Сергей Карякин иккинчи ўринда боряпти. Рустам Қосимжонов, Петер Свидлер, Борис Гелъфанд, Петер Леко, Шаҳриёр Мамадяров, Руслан Пономарев, Ванг Хао каби гроссмейстерлар ҳисобида 1 тадан очко мавжуд. Гата Камский ва Ленъер Домингес Перес ҳисобида 0,5 тадан очко бор.
24 ноябрь куни 3-тур баҳслари ўтказилади ва унда қуйидаги жуфтликлар ўзаро баҳс юритадилар.
Ленъер Домингес Перес – Рустам Қосимжонов
Фабиано Каруано – Гата Камский
Борис Гелъфанд – Александр Морозевич
Шаҳриёр Мамадяров – Петер Свидлер
Руслан Пономарев – Петер Леко
Сергей Карякин – Ванг Хао
Учрашувлар 14:00да бошланади.
Шавкат Жалилов
Мадания ва спорт ишлари вазирлиги матбуот хизмати
