Лионель Месси МЛСда ажойиб дебют қилди. Захирадан майдонга тушган аргентиналик ҳужумчи "Нью-Йорк Ред Буллз" дарвозасига гол урди ва "Интер Майами" 2:0 ҳисобидаги ғалабани нишонлади.
Бироқ Мессининг Америка лигасидаги дебюти сояда қолиши мумкин. Goal портали хабарига кўра, 36 ёшли футболчи ўйиндан кейин журналистлар билан гаплашмагани учун жазоланиши мумкин. Бу МЛС қоидаларида талаб қилинган.
Шу билан бирга, Месси борасида ҳали қарор қабул қилинмагани қайд этилган. Балки аргентиналик футболчининг алоҳида мақомини инобатга олган ҳолда лига регламентнинг нисбатан кичик бузилишига кўз юмар.
