"Вулверхэмптон" ярим ҳимоячиси Матеуш Нунеш жамоа машғулотларини ўтказиб юборди ва унинг трансфери борасида музокаралар олиб бораётган "Манчестер Сити"га ўтиш истагини билдирди. Бу ҳақда The Athletic нашри хабар бермоқда.
Манбага кўра, энди 25 ёшли португалиялик футболчи интизомий жазога тортилади, агар трансфер жараёни амалга ошмаса, трансфер ойнаси ёпилганидан кейин у умумий гуруҳга қайтади.
Инсайдер Фабрицио Романонинг сўзларига кўра, "Манчестер Сити" янги таклиф билан чиқди. Бу бонуслар билан бирга 60 миллион евро, ўтган 50+5 миллион рад этилди.
"Бўрилар" ўтган ёзда Нунешни 42 миллион фунтга сотиб олганди. Ўшандан бери у 41 та ўйин ўтказиб, 1 та гол ва 1 та голли узатмани амалга оширди.
