Кеча Австралиянинг Перт шаҳрида сув полоси бўйича ёшлар ўртасида жаҳон чемпионати бошланди. Эътиборли томони, унда Ўзбекистон эркаклар ва аёллар терма жамоалари иштирок этишмоқда. Ҳар иккала терма жамоамиз ўзларининг дастлабки баҳсини бугун ўтказишди ва ғалаба қозонишди.

"С" гуруҳида иштирок этаётган Ўзбекистон эркаклар терма жамоаси Тринидад ва Тобаго ёшларини 19:16 ҳисобида мағлуб этди. Ўйин жуда қизиқарли бўлди. Ўйиннинг бошларида ўйин тенгкурашлар остида кечди — биринчи бўлимдан кейин ҳисоб - 2:2. Кейин эса ташаббус вакилларимиз томонига ўтди ва 2 ва 3-бўлимларда йигитларимиз ҳисобни 17:7 кўринишига олиб келишди. Сўнгги бўлимда эса терма жамоамиз ё чарчаб қолди, ёки хотиржамликка берилди шекилли, рақиблар тўла устунликка эга бўлишди. Якуний ҳисоб — 19:16. Ушбу ўйинда Кирилл Рустамов нақ 15та гол уришга муваффақ бўлди.

"Жуда қийин баҳс бўлди. Боиси, биз бу ерга 32 соатлик парвоздан кейин кеча етиб келдик ва бор-йўғри бир марта машғулот ўтказдик. Сафимизда келажаги порлоқ бўлган спортчилар кўп", дейди Кирилл Рустамов.

Ўзбекистон ёшлар терма жамоаси ўзининг навбатдаги баҳсини эртага Руминияга қарши ўтказади.

Ёшлар ўртасида жаҳон чемпионати
Эркаклар. "С" гуруҳи.

1-кун. 1 декабрь, шанба
Греция - Руминия - 8:5
Тринидад ва Тобаго - Эрон - 7:9

2-кун. 2 декабрь, якшанба
Ўзбекистон - Тринидад ва Тобаго - 19:16
Руминия - Эрон - 11:4