"Барселона" бош мураббийи Хави "Вильярреал" ярим ҳимоячиси Алекс Баэнани (суратда ўнгда) сотиб олишига қизиқмоқда. Бу ҳақда Mundo Deportivo хабар бермоқда.
Манба берган хабарга кўра, Хави 22 ёшли ярим ҳимоячининг тўп узатиш қобилияти ва техникасига юқори баҳо беради. Сўнгги пайтларда мушакларидан тез-тез жарохатланиб юрган Педрининг иш юкини камайтириш мақсадида харид "кўк-анорранглилар" бош мураббийи учун зарур.
Эслатиб ўтамиз, бу мавсумда Баэна Ла Лиганинг тўртта ўйинида қатнашиб, битта гол ва иккита голли узатмага муаллифлик қилган. Ўтган Испания чемпионатида футболчи 35 ўйинда майдонга тушган (6 гол ва иккита голли узатма). Transfermarkt порталида берилган маълумотларга кўра, футболчининг бозор қиймати 20 миллион еврони ташкил қилади.
