Чемпионат якунига етганидан сўнг турли рақамларга мурожаат қилиш, бошқача йтганда, статистика юритишнинг айни мавриди ҳисобланади. Сайтимизни мунтазам кузатиб бораётган мухлислар яхши билишади, сал аввалроқ «Шўртан» таркибида бу йилги мавсумда нечта футболчи майдонга тушгани-ю, ким неча дақиқа тўп сургани ҳамда кимлар гол ургани ҳақида умумий маълумотлар бергандик. Бу сафар эса ҳар 15 дақиқалик (чорак) бўйича жамоа нечта гол ургани-ю, нечта тўп ўтказиб юборгани, шунингдек, бу голларга кимлар муаллифлик қилгани тўғрисида тўхталамиз. Бунда ҳам албатта рақамлар ёрдамига таянамиз.

Яхши биласиз, футбол 90 ва ундан сал кўпроқ дақиқа мобайнида ўйналадиган спорт тури ҳисобланади. Аммо кўпчиликка яхши тушунарли бўлиши учун статистикада футбол 90 дақиқадан иборат деб юритилади. Бу эса мухлислар учун ҳам бирмунча тушунарли бўлади. Агар 90 дақиқани 15 дақиқага бўлиб чиқадиган бўлсак, 6та қисм юзага келади. Шунда футбол 90 дақиқадан, 90 дақиқа 45 дақиқалик икки бўлимдан ва ҳар бир бўлим 15 дақиқалик 3 қисмдан иборат дейишимиз мумкин. Бунда 1-15-дақиқалар оралиғи 1-қисм, 16-30-дақиқалар оралиғи 2-қисм, 31-45-дақиқалар оралиғи 3-қисм, 46-60-дақиқалар оралиғи 4-қисм, 61-75-дақиқалар оралиғи 5-қисм ҳамда 76-90-дақиқалар оралиғи эса 6-қисм деб номланади.
 
ҲАР 15 ДАҚИҚАЛИКДА УРИЛГАН ГОЛЛАР
Анна энди бироз тушунарли бўлиши учун ушбу қисмларни «Шўртан»нинг бу йилги олий лигадаги урган ва ўтказиб юборган голлари мисолида кўриб чиқамиз. Хабарингиз бор, «Шўртан» якунига етган чемпионатда рақиблар дарвозасига 38та тўп киритиб, ўз дарвозасиздан 33та гол ўтказиб юборди. Ҳар чорак дақиқа (ёки таймларнинг ҳар бир қисми) бўйича олиб қарайдиган бўлсак, футболчиларимиз бўлиб ўтган ўтган учрашувларнинг дастлабки 15 дақиқаси ичида 8та гол уришган. Ўйинларнинг 2 ва 3-қисмларида эса бештадан жами ўнта гол урилган. Шунда «Шўртан»нинг биринчи бўлимларда киритган тўплари сони 18тани ташкил қилади.

Иккинчи тайм бошланганидан сўнг илк 15 дақиқа оралиғида эса футболчиларимиз 7 бор рақиблар дарвозасини ишғол қилишган. Бу кўрсаткич танаффусда мураббийларнинг айтгани зое кетмаганини билдиради ва футболчилар майдонга қайтишлари биланоқ катта шижоат билан ўйинни бошлашганини англатади. 61-75-дақиқалар оралиғида «оқ бўрилар» атиги 3та гол уришган. Аммо 76дан 90-дақиқача бўлган сўнгги 15 дақиқалик вақт ичида футболчиларимиз 10та тўп киритишган. Бу ҳам ўз навбатида футболчилар охиригача, то ҳакам ҳуштаги чалингунча курашганини билдиради.  
 
Урилган голлар:
1-15-дақиқалар: 8та
16-30-дақиқалар: 5та
31-45-дақиқалар: 5та
46-60-дақиқалар: 7та
61-75-дақиқалар: 3та
76-90-дақиқалар: 10та
  
ГОЛЛАРНИ КИМЛАР УРГАН?
Анна энди ҳар 15 дақиқада жамоадан кимлар гол урганини келтириб ўтамиз. Шу ўринда бир нарсани эсдан чиқармайлик, юқорида дастлабки 15 дақиқа ичида футболчиларимиз 8та гол уришган деб айтиб ўтдик, лекин иккита гол автогол эканини ёдга олиш лозим. Яъни, «Андижон» ва «Машъал» билан кечган баҳсларда Икром Ибрагимов билан Абдували Мўминов ўз дарвозаларига тўп киритиб қўйишган. Натижада биздан гол урган футболчилар сони олтитани ташкил этяпти. Булар – Ботир Қодирқулов (2та), Вадим Афонин, Виктор Клишин, Игорь Таран ва Аббос Омонов.

Иккинчи 15 дақиқалик ичида клубимиз тўпурари - биргина Игорь Тараннинг ўзи 4 марта гол урган, яна битта гол эса Ботир Қодирқулов номига ёзилган. Биринчи таймнинг 3-қисмида ҳам 5 бор рақиблар дарвозаси нишонга олинган ва голлар Игорь Таран (2та), Вячеслав Пономарёв, Ботир Қодирқулов ҳамда Фарҳод Тожиев номига ёзилган.

Қуйида ҳар 15 дақиқа оралиғида «Шўртан» вакилларидан кимлар тўп киритганини келтириб ўтамиз. Яна шуни айтиб ўтишимиз мумкин, ўйинларнинг охирги 15 дақиқасида гол уриш бўйича Игорь Таранга тенг келадигани топилмади, ҳужумчимиз 5 марта тўп киритишга муваффақ бўлди. Бу борада кейинги ўринни Лазиз Убайдуллаев эгаллади, унинг ҳисобида иккита гол бор.  
 
Гол урган футболчилар:
1-15-дақиқалар: Б.Қодирқулов (2та), В.Афонин, В.Клишин, И.Таран, А.Омонов.
16-30-дақиқалар: И.Таран (4та), Б.Қодирқулов.
31-45-дақиқалар: И.Таран (2та), В.Пономарёв, Б.Қодирқулов, Ф.Тожиев.
46-60-дақиқалар: М.Мамазулунов, И.Таран (2та), Ф.Тожиев (2та), П.Агбо, Б.Қодирқулов.
61-75-дақиқалар: М.Мамазулунов, Адама Соро, Ф.Тожиев.
76-90-дақиқалар: И.Таран (5та), П.Агбо, Л.Убайдуллаев (2та), А.Омонов, И.Хазигалиев.