Ўзбекистон футболи фахрийлари кенгаши "Пахтакор" футбол клубини миллионлаб мухлислар армияси номидан жамоани навбатдаги бор Ўзбекистон чемпионлигига эришгани билан чин юракдан табриклайди.
"Пахтакор" кўп миллатли Ўзбекистоннинг фахрига айланган. Юртимизнинг етакчи жамоасига айланган ҳолда Ўзбекистон футболи ривожига муносиб ҳисса қўшиб келмоқда. Миллий футболимиз тарихида кўплаб пахтакорчиларни алоҳида эътироф этиш мумкин. Геннадий Красницкий, Биродар Абдураимов, Михаил Ан, Владимир Федоров, Миржалол Қосимов, Одил Аҳмедов жаҳон даражасида тан олинган. Севимли жамоамизнинг ҳозирги авлоди ғалабали одимни давом эттираётганидан фахрланамиз. "Пахтакор" футболчилари Ўзбекистон терма жамоалари таркибида ўзларини кўрсатишяпти, Осиё ва жаҳон чемпионатларида муваффақиятларга эришмоқда. Ишонамизки, Ўзбекистон терма жамоаси 2014 йил Бразилияда ўтказиладиган жаҳон чемпионатига йўлланма олади ва унинг таркибида севимли клубимиз "Пахтакор" футболчилари етакчи ролларни бажаришади.
"Пахтакор" фахрийлари жамоанинг 2012 йил мобайнида ҳужумкор ўйин кўрсатиб, тўққизинчи марта мамлакат чемпионига айланганидан фахрланишди. Эътиборлиси, бу йилги жамоа таркиби нафақат миллий чемпионат, балки Осиё Чемпионлар лигаси иштирокчилари орасида ҳам энг ёши бўлганди. Бу бизга Ўзбекистон футболи куч тўплаётгани ва Осиё қитъасида энг юқори ўринларга даъвогарлик қилишга тайёрлигига умид қилишга имконият беради.
Футболчилар, мураббийлар, раҳбарият ва клуб ходимларини 2012 йилги чемпионатдаги унутилмас ғалаба билан муборакбод этади ва яшил майдонларда янги ёрқин ғалабаларни тилаб қоламиз!
ЎЗБЕКИСТОН ФУТБОЛ ФАХРИЙЛАРИ КЕНГАШИ ВАКИЛИ
Н.Д.ЖАЛОЛОВ
