12 декабрь куни "Пахтакор" академиясининг "Чилонзор" стадиони сунъий майдонида, 1998 йилда таваллуд топган футболчилар учун назорат синов учрашуви ўтказилди. Бу тадбирни ўтказишдан асосий мақсад, "Пахтакор" футбол академияси сафини истеъдодли футболчилар билан бойитиб олиш.
 
Айни пайтда Тошкент шаҳар чемпионатида ғолибликни қўлга киритган жамоага Ленур Еремеев бош мураббийлик қилаяпти. Тадбир давомида бир неча нафар янги футболчилар иштирок этдилар. Улар кузатувга келган клуб раҳбарияти, Самвел Бабаян, Мурод Исмоилов,  Виктор Жалилов, Валерий Борадавкин ва фахрли меҳмон Одил Аҳмедов кўз ўнгиларида ўз маҳоратларини намойиш этдилар.

"Ўз пайтида Одил Аҳмедовни ҳам мана шундай ўйинлар орқали топган эдик. Бу каби тадбирларни доимий тарзда ўтказиб туришимиз натижасида, сўнгги йилларда сафимизда истеъдодли футболчилар кўпайиб бораяпти. Бугун ҳам бир неча яхши футболчиларни кўрдик. Мураббийлар билан келишган ҳолда, уларни ўз сафимизга қўшиб оламиз", - дейди клуб Вице-президенти Самвел Бабаян.
 
Одил Аҳмедовнинг фикри эса қуйидагича кўриниш олди: "Йил давомида ёшларга эътибор қаратиш лозим. Ўз пайтида биз ҳам шу укаларимиз каби назорат ўйинларида майдонга тушиб, мутахассислар назарига тушганмиз. "Пахтакор" анча йиллардан бери ёшларга катта эътибор қаратиб келаяпти. Бу йил жамоа Ўзбекистон чемпиони бўлди, бунда мана шу ёшларни ўрни катта".