Халқаро олимпия қўмитаси ва ФИФА Жанубий Корея Олимпия ва миллий терма жамоалари аъзоси Парк Жонг Ву («Бусан»)ни расмий мусобақаларда 2та ўйиндан четлатиш ҳақида қарор чиқарди. Бунга сабаб қилиб футболчининг Лондон олимпиадасининг учинчи ўрин учун бўлган ўйиндаги голни миллий низо чиқариб келтириши мумкин бўлган ҳолатда нишонлаганлиги кўрсатилмоқда.
Лондон Олимпиадаси футбол мусобақасида Япония терма жамоасига қарши учинчи ўрин учун бахсда футболчи голни нишонлаш мақсадида «Докдо – бизнинг еримиз!» дея ёзилган қоғозни кўтарганча стадионда югурган эди. Шундан сўнг футболчи бронза медалини топшириш маросимига ҳам қўйилмаган эди.
Маълумки, бир неча йилдан буён Жанубий Корея ва Япония давлатлари Докдо ороли кимга тегишли эканлиги борасида келишолмай келади. Жанубий Корея орол ўзларига қарашли худудга яқинлигини хисобга олиб, Докдони Корея мулки деб эълон қилишган бўлса-да, Япония ҳам бу оролга даъвогарлик қилиб келади. Футболчи энди кейинги йили ЖЧ саралаш ўйинларининг Қатар (уйда, 2013 йил 26 март) ва Ливан (сафарда, 2013 йил 4июнь)га қарши ўйинларини ўтказиб юборади. Ўзбекистон (уйда, 2013 йил 11 июнь) ва Эрон (уйда, 2013 йил 18 июнь) билан ўйинларгача эса терма жамоа ихтиёрига қайтади.
Отабек Йўлдошев, Жанубий Корея, Сеул
