"Арсенал" ярим ҳимоячиси Эмиль Смит-Роуга Премьер-лиганинг бошқа клублари қизиқиш билдирмоқда.
Аввал хабар қилинганидек, 23 ёшли футболчи Микель Артета жамоасида ўйин тажрибаси камлиги туфайли кетиш ҳақида ўйламоқда. Журналист Экрем Конурнинг ёзишича, айни дамда ҳужумкор ярим ҳимоячига АПЛнинг тўртта клуби қизиқиш билдирмоқда – “Кристал Пэлас”, “Астон Вилла”, “Ньюкасл” ва “Эвертон”. Улар хавбеки январь ойида трансфер қилмоқчи.
Эмиль Смит-Роу жорий мавсумда "Арсенал"нинг барча мусобақалардаги олтита ўйинида майдонга тушди ва жами атиги 136 дақиқа ўйнади. Transfermarkt хабарига кўра, англиялик футболчининг трансфер қиймати 30 миллион эврони ташкил қилади.