"Бухоро" жамоаси ҳозир таътилда эканлигидан хабардорсиз. Жамоа режага кўра 24 декабрда ўз базасида тўпланади. Легионерларимиз январь ойидан жамоа ихтиёрига етиб келишади. Ҳозирда жамоани расман фақат Жасур Ҳасанов тарк этган. Ҳаммага маълумки, япониялик футболчи Наоя Шибамурани "Бухоро" жамоаси "Пахтакор"дан тўлиқ трансфер ҳуқуқини сотиб олган. Шу сабабли Шибамуранинг жамоани тарк этиши ҳақидаги миш-мишлар тўлиқ ўз тасдиғини топмаган.

Жамоамиз бош мураббийи Тачмурод Агамуродов ҳам "Бухоро" жамоасида ишлашда давом этиши ҳақиқатга яқинроқ бўлиб турибди. Ҳаркалай жамоамиз раҳбарияти  томонидан Агамуродовни сақлаб қолиш учун барча имкониятлар ишга солинган. Ҳаммага маълумки, Агамуродов қўлостида бухороликлар мазмунли ўйнай бошлашди ва табиийки бу мураббийга бошқа жамоалар ҳам даъвогарлик қилишмоқда.

Ўтган мавсумда жамоа ўзагини ташкил қилган футболчилар келаси мавсумда ҳам жамоамиз шарафини ҳимоя қилишади. Булардан ташқари бир неча маҳоратли футболчилар сотиб олиниши режалаштирилган. "Пахтакор" жамоасидан ижара асосида тўп сурган баъзи футболчилар "Бухоро"да қолишлари мумкин. Демак, келаси мавсумда "Бухоро"дан янада чиройли ва мухлисларга ёқадиган футбол кутишган ҳақлимиз.