Мадриднинг «Реал» клуби ҳужумчиси Криштиану Роналду «қироллик клуби» билан янги шартнома имзоламайдиган кўринади. Бу ҳақда «AS» нашри хабар тарқатди.
Манбанинг маълум қилишича, 27ёшли португалиялик футболчи шартномасининг сўнггига қадар Мадридда қолиб 2015 йилнинг ёзида эркин агент сифатида клубдан кетишни истамоқда. «Реал» эса унга 2018 йилга қадар мўлжалланган шартнома орқали йиллик ҳисоб-китоб миқдорини 10 миллион евродан 15 миллион еврога оширишга тайёрлигини маълум қилган.
Агар Криштиану Роналду «Реал»дан кетадиган бўлса, футболчига асосий даъвогар сифатида унинг собиқ жамоаси «Манчестер Юнайтед» кўрсатиб ўтилган. Эслатиб ўтамиз, Роналду сентябрь ойи бошида «Реал»даги фаолиятидан қониқиш ҳосил қилмаётганини таъкидлаб ўтганди.













