Жоау Феликс "Барселона"да яна камида бир мавсум қолиши мумкин.
Португалиялик футболчи "Атлетико"дан 2024 йилнинг ёзига қадар сотиб олиш ҳуқуқисиз ижарага олинган.
Diario Sport нашри хабарига кўра, "кўк-анорранглилар" мадридликлар талаб қиладиган 80 миллион евро эвазига португалияликни сотиб олишга қурби етмайди. Шу сабабли, Феликсни яна ижарага олиш ғояси пайдо бўлди, лекин бу сафар сотиб олиш опцияси билан. Бу ҳолатда "Атлетико" сўралган суммани сезиларли даражада камайтиришга тайёр бўлиши кутилмоқда.
Испания чемпионлари раҳбарларининг фикрича, янги келишув бўлган тақдирда улар Феликсни 20 миллион еврога сотиб олишлари мумкин ва бу вариант барчага маъқул келишига ишонишади.
Муқобил вариант - шартномага "Барселона"га унчалик керак бўлмаган, аммо "Атлетико"га ёқадиган футболчиларни киритиш.
Қайд этилишича, футболчининг ўзи Мадрид клубига қайтишни истамаяпти ва мадридликлар ҳам Феликсга ишонч билдирмаяпти. Каталонияликлар мавсум охиригача ҳеч нарса қилмоқчи эмас.
