Диққат, Англия футбол ассоциациядан навбатдаги шов-шувли хабар:

АПЛ ўйинларида яқин орада робот-ҳакамларни синовдан ўтказиш жараёни бошланади. Оҳ, футболчиларга ачиниш керак. Ахир темир-ҳакамга на эътироз билдириш мумкин, на бақириш...

Хабар берилишича, АФА бош ижрочи-директори Марк Буллингем раҳбарлигида Англия футболида «автоном» робот-ҳакамлар хизматини жорий этиш ғоясини фаол ўрганиб чиқмоқда. Барчасига АПЛ доирасидаги охирги учрашувларда кузатилган юқори даражали ҳакамлик хатолари серия­си сабабдир. Жаноб Буллингем Daily Mail нашрига берган интервьюсида бу масалада муайян қарашга эгалигини яширмади: «Албатта, олдин ҳам ҳакамларнинг нотўғри қарорлари юзасидан етарлича эътироз ва расмий шикоятлар тушган. Энди хатоларни камайтириш масаласида қатъий қадам ташлаш керак. Менимча, робот-ҳакамлар ғояси бу борада бошланғич нуқта бўлади. Ҳозир технология нуқтаи назаридан катта савол бор: қарорларни тезроқ қабул қилиш имкониятини ошириш мумкинми? Чунки ўйин вақти юзага келадиган узоқ тўхталишлар ҳеч кимга ёқмайди, барибир».

АФА бош ижрочи-директорининг айтишича, Англияда ҳакамликни тўлиқ автоматлаштириш ғоясига қизиқиш катта. «Мана, масалан, ўйиндан ташқари ҳолатни аниқлаштириш учун ярим автоматик технология­дан фойдаланаётганимизга анча бўлди. Хўш, ҳакамлик охир-оқибат, бутунлай автоматлаштирилиши мумкинми? Нега мумкин эмас. Ҳар ҳолда, уриниб кўриш керак...», - дея Марк Буллингем сўзларидан иқтибос келтирди Daily Mail нашри.