Аргентинанинг «Бока Хуниорс» ва Бразилиянинг «Флуминенсе» клублари ўртасидаги Либертадорес кубоги финали олдидан Рио-де-Жанейрода юз берган муштлашув оқибатида уч нафар мухлис ҳибсга олинган. Жанубий Америка футболининг бошқарув кенгаши пайшанба куни зўравонликни қоралади.

Финал ўйини олдидан бўлган муштлашувдан сўнг икки аргентиналик мухлис ва бир бразилиялик ҳибсга олинди.

«КОНМEБОЛ «Бока Хуниорс» ва «Флуминенсе» мухлисларини футболимиз бизга тақдим этаётган қувонч ва байрам лаҳзаларини биргаликда баҳам кўришга чақиради.

Спортнинг қадриятлари тинч ва уйғун хулқ-атворни илҳомлантириши керак. Шунинг учун биз финал фонида содир бўлиши мумкин бўлган ҳар қандай зўравонлик ва ирқчилик ҳаракатларини рад этамиз», – дейилади баёнотда.

Аргентинанинг La Nacion нашри хабарига кўра, шанба куни «Маракана» стадионида бўлиб ўтадиган финалга 20 000 га яқин «Бока» мухлислари ташриф буюриши кутилмоқда, чунки уларнинг жамоаси Либертадорес чемпионлигини қўлга киритмоқчи.