Хабарингиз бор, “Навбаҳор” Осиё Чемпионлар лигаси (ОЧЛ)нинг “D” гуруҳидан ўрин олган ва ушбу гуруҳдан “плей-офф” босқичига чиқиш учун “Ал-Ҳилол” (Ар-Риёд, Саудия Арабистони), “Нассажий Мазандаран” (Каэмшаҳр, Эрон) ва “Мумбай Сити” (Мумбай, Ҳиндистон) жамоаларига қарши кураш олиб бормоқда.

Шу боис, сизларни “лочинлар”нинг ОЧЛ гуруҳидаги рақиблари борасидаги маълумотлар билан ҳам таништиришга қарор қилдик.

Кеча “Нассажий Мазандарон”нинг Эрон Про лигасидаги натижалари ҳақида тўхталгандик. Бу сафар эса “Мумбай Сити” борасида маълумот бермоқчимиз.

Мумбайликлар 2 ноябрь куни Ҳиндистон Суперлигаси 5-туридан ўрин олган баҳсни ўз майдонларида “Панжоб”га қарши ўтказиб, 2:1 ҳисобида ғалаба қозонишди.

Таъкидлаш жоизки, мазкур ўйиндаги барча голларга легионерлар муаллифлик қилишди. Учрашувнинг 38-дақиқасида панжобликларнинг словениялик ҳужумчиси Лука Майцен мезбонлар дарвозасини аниқ нишонга олиб, жамоасининг танаффусга 1:0 ҳисобидаги ютуқ билан чиқиб кетишини таъминлади.

Иккинчи бўлимда ҳужумни кучайтирган майдон эгалари бир дақиқа ичида, яъни, 82-дақиқада 2 та тўп киритишга муваффақ бўлишди. Голларга “Мумбай Сити”нинг аргентиналик ва шотландиялик ҳужумчилари – Жорже Перейра Диаз ҳамда Грег Стюартлар муаллифлик қилишди.

Натижада ушбу беллашувда мумбайликлар 2:1 ҳисобида иродали тарзда ғалаба қозонишди.   

Мазкур ютуқдан сўнг, “Мумбай Сити” Ҳиндистон Суперлигасида 5 та баҳсдан кейин, 3 та ютуқ, 2 та дуранг, 9-6 тўплар нисбатини қайд этган ҳолда, 11 очко жамғариб, 12 жамоа орасида 2-ўринда бормоқда.

“Навбаҳор” ПФК матбуот хизмати.