"Байер" ҳимоячиси Алехандро Гримальдо фаолиятини қаерда давом эттирмоқчи эканлиги ҳақида гапирди.

"Келажакда мен Испанияда ўйнашни хоҳлайман, чунки бу лигада мен доимо ўйнашни ва уйда ўйнашни хоҳлаётганимни айтганман. Лекин айни дамда мен Леверкузенда жуда бахтлиман. Бу ерга келганимга қисқа вақт бўлди ва бундан кўпроқ завқ олмоқчиман", - деди Гримальдо Kicker билан суҳбатда.

Гримальдо "Барселона" битирувчиси бўлиб, U16 жамоасидан "Барселона Б"га қадар ўйнаган.

28 ёшли футболчи 2023 йилнинг июль ойида эркин агент сифатида "Бенфика"дан "Байер"га ўтган эди. Гримальдонинг клуб билан шартномаси 2027 йилнинг ёзига қадар мўлжалланган. Transfermarkt испаниялик футболчини 25 миллион еврога баҳоламоқда.

Жорий мавсумда Гримальдо 17 та ўйин ўтказиб, 8 та гол урди ва 6 та голли узатмани амалга оширди.

11 турдан кейин “Байер” 31 очко билан Бундеслигада биринчи ўринни эгаллаб турибди. "Бавария" иккинчи ўринда (29 очко).