Суперлиганинг жорий йилги мавсуми якунланишига яна иккита тур қолди. Мухлисларни доимгидек тўпурарлик пойгасидаги кураш ҳам жуда қизиқтираётгани бор гап.
Айни пайтда “Андижон” ҳужумчиси Рубин Хебай билан “Пахтакор” сардори Драган Черан 12 та гол билан пешқадамлик қилиб туришибди. Улардан кейин 10 та гол билан “Сурхон” ҳужумчиси Силванус Нимели бор. Кўриниб турибдики, тўпурарлар орасидаги кураш ҳам жуда қизиқарли тус олган. Охирги ўйинлар ушбу ҳужумчилар учун ҳам ҳал қилувчи аҳамият касб этади.
“Андижон” жамоасида ўз вақтида тўпурар ҳужумчи сифатида Бахтиёр Ҳамидуллаев порлаб чиққанини барча яхши эслайди. “Батигол” номи билан машҳур бўлган собиқ футболчи Ўзбекистон чемпионати тарихида 200 га яқин голлар муаллифига айланган. Икки марта “Андижон” сафида Ўзбекистоннинг энг яхши тўпурарига айланган.
Ҳамидуллаевнинг дастлабки тўпурарлиги 1999 йилда юз берган бўлиб, ўшанда 24 та гол билан Умид Исоқов иккиси Ўзбекистон чемпионати тўпурарига айланган. 2002 йилда эса Бахтиёр бир ўзи энг яхши тўпурар мақомига эришган. Ўшанда у рақиблар дарвозасига 22 та гол урган. Бундан ташқари, Ҳамидуллаев 2000 йилги мавсумда 33, 2001 йилда эса 25 та гол урган.
Айтмоқчимизки, “Андижон” клуби тарихида Ҳамидуллаев икки марта энг яхши тўпурар мақомига эришган. Охиргиси 2002 йилда кузатилган. Орадан 21 йил ўтиб, яна “Андижон” клуби футболчиси Ўзбекистон чемпионати тўпурари бўлиш учун яхши имкониятга эга бўлиб турибди. Табиийки, бу ҳолат “Андижон” жамоасининг афсоналаридан бири ҳисобланган Бахтиёр Ҳамидуллаевни ҳам беэътибор қолдираётгани йўқ. Шу сабабли “Батигол” Рубин Хебай ҳақида ва унинг тўпурар бўлиш имконияти тўғрисида ўз фикрлари билан ўртоқлашди.
“Рубин Хебай тўғрисида нима дейиш мумкин? Бу йил “Андижон” жамоасига қўшилганидан кейин тўпурарлар орасида етакчилардан бўлиб келаётгани андижонлик мухлисларда ишонч ва футболга бўлган меҳр-муҳаббатни бошқатдан уйғотгандек бўлди. Ишқибозлар жамоага янада кўпроқ ишонишни бошлади. Охирги йилларда “Андижон” асосан Суперлигада қолиш учун ўйнарди. Лекин бу йилги иштироки олдингиларига нисбатан анча яхши бўляпти. Мухлисларнинг жамоага нисбатан ишончи ортишига ҳам Хебайнинг ҳиссаси катта деб ўйлайман. Ушбу ҳужумчи ўзининг ўйини ва голлари билан ўша мухлисларга ишончни қайтарди.
Ҳозир Рубин Хебай Драган Черан билан рақобат ҳосил қилиб тўпурарлик учун курашяпти. Улардан кейин Силванус Нимели турибди. Менимча, Хебайда имконият кўпроқ. Негаки, “Андижон” жамоасининг иккита ўйини ҳам аутсайдерлар билан ўтади. Ўша учрашувларда голлар сонини ошириб олса бўлади. Тўпурар бўлиш учун имконият Черан ёки Нимелидан кўра Хебайда кўпроқ, деб ўйлайман.
Рубиннинг совуққонлиги ёқяпти. Жамоадошлари жарима майдони атрофида кўпроқ унга ўйнаши ҳам манзур бўляпти. Хебай ўз имкониятидан яхши фойдаланяпти.
Адашмасам, мавсум бошларида у бир нечта учрашувларни ўтказиб юборганди. Назаримда, ўша пайтларда кўпчиликда Хебайга нисбатан тўпурарлик учун даъвогарлардан бири бўлади, деган фикр бўлмаган бўлса керак.
Албатта, у билан айрим жабҳаларда фарқимиз бўлса керак. Нимагаки, Хебай орқароқдан тўпни эгаллаб ҳужумга ўтишга ҳаракат қиляпти. Чап ва ўнг қанотдан ҳужумлар уюштирилганида ҳам жарима майдони атрофида ҳозир бўлиб, қайтган тўпни гол билан якунлашга ҳаракат қиляпти. Мен бунақа пайтларда кўпинча дарвозани яқинида бўлардим”, - дейди Ҳамидуллаев.
