Superliganing joriy yilgi mavsumi yakunlanishiga yana ikkita tur qoldi. Muxlislarni doimgidek to‘purarlik poygasidagi kurash ham juda qiziqtirayotgani bor gap.

Ayni paytda “Andijon” hujumchisi Rubin Xebay bilan “Paxtakor” sardori Dragan Cheran 12 ta gol bilan peshqadamlik qilib turishibdi. Ulardan keyin 10 ta gol bilan “Surxon” hujumchisi Silvanus Nimeli bor. Ko‘rinib turibdiki, to‘purarlar orasidagi kurash ham juda qiziqarli tus olgan. Oxirgi o‘yinlar ushbu hujumchilar uchun ham hal qiluvchi ahamiyat kasb etadi.

“Andijon” jamoasida o‘z vaqtida to‘purar hujumchi sifatida Baxtiyor Hamidullayev porlab chiqqanini barcha yaxshi eslaydi. “Batigol” nomi bilan mashhur bo‘lgan sobiq futbolchi O‘zbekiston chempionati tarixida 200 ga yaqin gollar muallifiga aylangan. Ikki marta “Andijon” safida O‘zbekistonning eng yaxshi to‘purariga aylangan.

Hamidullayevning dastlabki to‘purarligi 1999 yilda yuz bergan bo‘lib, o‘shanda 24 ta gol bilan Umid Isoqov ikkisi O‘zbekiston chempionati to‘purariga aylangan. 2002 yilda esa Baxtiyor bir o‘zi eng yaxshi to‘purar maqomiga erishgan. O‘shanda u raqiblar darvozasiga 22 ta gol urgan. Bundan tashqari, Hamidullayev 2000 yilgi mavsumda 33, 2001 yilda esa 25 ta gol urgan.

Aytmoqchimizki, “Andijon” klubi tarixida Hamidullayev ikki marta eng yaxshi to‘purar maqomiga erishgan. Oxirgisi 2002 yilda kuzatilgan. Oradan 21 yil o‘tib, yana “Andijon” klubi futbolchisi O‘zbekiston chempionati to‘purari bo‘lish uchun yaxshi imkoniyatga ega bo‘lib turibdi. Tabiiyki, bu holat “Andijon” jamoasining afsonalaridan biri hisoblangan Baxtiyor Hamidullayevni ham bee’tibor qoldirayotgani yo‘q. Shu sababli “Batigol” Rubin Xebay haqida va uning to‘purar bo‘lish imkoniyati to‘g‘risida o‘z fikrlari bilan o‘rtoqlashdi.

“Rubin Xebay to‘g‘risida nima deyish mumkin? Bu yil “Andijon” jamoasiga qo‘shilganidan keyin to‘purarlar orasida yetakchilardan bo‘lib kelayotgani andijonlik muxlislarda ishonch va futbolga bo‘lgan mehr-muhabbatni boshqatdan uyg‘otgandek bo‘ldi. Ishqibozlar jamoaga yanada ko‘proq ishonishni boshladi. Oxirgi yillarda “Andijon” asosan Superligada qolish uchun o‘ynardi. Lekin bu yilgi ishtiroki oldingilariga nisbatan ancha yaxshi bo‘lyapti. Muxlislarning jamoaga nisbatan ishonchi ortishiga ham Xebayning hissasi katta deb o‘ylayman. Ushbu hujumchi o‘zining o‘yini va gollari bilan o‘sha muxlislarga ishonchni qaytardi.

Hozir Rubin Xebay Dragan Cheran bilan raqobat hosil qilib to‘purarlik uchun kurashyapti. Ulardan keyin Silvanus Nimeli turibdi. Menimcha, Xebayda imkoniyat ko‘proq. Negaki, “Andijon” jamoasining ikkita o‘yini ham autsayderlar bilan o‘tadi. O‘sha uchrashuvlarda gollar sonini oshirib olsa bo‘ladi. To‘purar bo‘lish uchun imkoniyat Cheran yoki Nimelidan ko‘ra Xebayda ko‘proq, deb o‘ylayman.

Rubinning sovuqqonligi yoqyapti. Jamoadoshlari jarima maydoni atrofida ko‘proq unga o‘ynashi ham manzur bo‘lyapti. Xebay o‘z imkoniyatidan yaxshi foydalanyapti.

Adashmasam, mavsum boshlarida u bir nechta uchrashuvlarni o‘tkazib yuborgandi. Nazarimda, o‘sha paytlarda ko‘pchilikda Xebayga nisbatan to‘purarlik uchun da’vogarlardan biri bo‘ladi, degan fikr bo‘lmagan bo‘lsa kerak.

Albatta, u bilan ayrim jabhalarda farqimiz bo‘lsa kerak. Nimagaki, Xebay orqaroqdan to‘pni egallab hujumga o‘tishga harakat qilyapti. Chap va o‘ng qanotdan hujumlar uyushtirilganida ham jarima maydoni atrofida hozir bo‘lib, qaytgan to‘pni gol bilan yakunlashga harakat qilyapti. Men bunaqa paytlarda ko‘pincha darvozani yaqinida bo‘lardim”, - deydi Hamidullayev.