Суперлиганинг 21-туридан ўрин олган "Сурхон" – "Олимпик" (1:0) учрашувидан сўнг мезбонлар бош мураббийи Сергей Арслонов ўз фикрларини билдириб ўтди.
"Олимпик"ни кучли шаклланган, шижоатли жамоа эканлигини билардик. Улар нафақат ёшлардан ташкил топган жамоа, балки клубнинг мураббийлар штабини ҳам алоҳида таъкидлаб ўтган бўлардим. Биринчи таймда ҳам яхши ҳаракат қилдик, деб ўйлайман. Иккинчи бўлимда ҳам кичик имкониятлардан фойдаланишга интилдик. Танаффусдан кейин ўйин сурати бутунлай ўзгариб кетди. Анча жанговар ўйин кўрдик. Учрашув тенг курашлар остида ўтган бўлса-да, хавфли вазиятлар кўпроқ рақиб дарвозаси олдида юз берди. Биз кўзлаган мақсадга эришдик.
Шамсиевнинг жароҳати жиддий ва тикланиш жараёни узоқлашиб кетаётганидан хавотир оляпмиз. Султонмуродовда ҳам жароҳат бор, лекин у тез орада тахминан икки хафталарда сафга қайтади, деб ўйлайман
Имкон қадар тажрибали ўйинчилар билан ҳамоханг равишда ёшларни тарбиялаш, уларни таркибга қўшиш, клубимизнинг асосий вазифаларидан бири ҳисобланади. Биз тарбиялаётган йигитлар келажакда гранд жамоаларимиз ва хориж жамоаларида ўйнаш учун трамплин вазифасини ўтаб беради. Юқорида таъкидлаганимдек, ёшларга кўпроқ эътибор қаратиш ва тажрибали ўйинчилар ёрдамида маҳоратини ошириш устивор вазифаларимиз қаторига киради.
Агар ритм ҳақида таъкидлайдиган бўлсак, буни турлича тушуниш мумкин. Масалан, тўп майдондан чиқиб кетганида бу ўйин ритмига ёмон таъсир қилади. Қолаверса, ўйин сифатига ҳам салбий таъсир қилиши мумкин. Футболчиларимизга ўйинни чўзиш, ритмни тушириш каби тушунчаларни бермаймиз ва ўргатмаймиз. Тезкор ўйинни, тўп майдон ичида бўлишини кўпроқ ўргатамиз. Фалсафамиз майдонда кўпроқ ҳаракат қилиш ва "Сурхон"даги ёшларга ўйнаш учун имконият яратиб бериш ҳисобланади”, – деди Арслонов.
