Андре Онана "Манчестер Юнайтед"нинг навбатдаги ўйинигача тикланиши мумкин.

Эслатиб ўтамиз, “Манчестер Юнайтед” дарвозабони Камерун терма жамоаси сафида ўйнаб, тўпиғидан жароҳат олган эди. Онана ЖЧ-2026 саралашида Маврикийга қарши ўйиннинг (3:0) 81-дақиқасида кучли зарба қабул қилиб олиб, майдонни тарк этди.

ESPN нашри хабарига кўра, Онана якшанба куни "Манчестер Юнайтед" ихтиёрига қайтган. Футболчи 26 ноябрь куни "Эвертон"га қарши ўйинда майдонга тушишга умид қилмоқда. Тахминларга кўра, дарвозабоннинг жароҳати мушакларнинг кучланиши билан боғлиқ эмас, шунинг учун тикланиш камроқ вақт талаб қилиши мумкин.

Қайд этилишича, Онананинг “Эвертон” билан ўйинда иштирок этиши ҳақидаги қарор футболчи яқин орада ўтказиладиган тиббий кўрик натижаларига кўра қабул қилинади.