Тошкент вилоятининг «Олмалиқ» жамоаси бугун илк назорат учрашувини «Пахтакор» ўринбосарларига қарши ўтказди. Таркибда футболчилар кўплиги боис, ҳар бир тайм 35 дақиқадан иккита ўйин ташкиллаштирилди.

Дастлабки баҳсда олмалиқликлар 3:0 ҳисобида ғалаба қозонди. Голларни Зафар Полвонов, Самандар Шодмонов ва Исроил Турсуновлар киритишди.

Иккинчи баҳсда асосан кўрикдан ўтаётган футболчилар майдонга тушишди. «Пахтакор» таркиби ҳам тўлиқ ўзгартирилди. Биринчи 35 дақиқаликда устунлик ёш пахтакорчилар тарафида бўлди. Ҳимоядаги хатолар кетма-кетлиги натижасида Дониёр Усмонов қўриқлаётган дарвозадан уч марта тўп олиб чиқишга мажбур бўлди. Тайм якунида Дмитрий Краев ҳисобни қисқартирди. Иккинчи тайм якунида Абдураззоқ Жўраев ва Зафар Тўраевлар яна биттадан гол уришди. Якуний ҳисоб 3:3 кўриниш олди. Зафар Тўраев бир марта 11 метрлик жарима зарбасини ноаниқ амалга оширди.

«Олмалиқ» футболчилар навбатдаги назорат баҳсини 14 январь куни «Бунёдкор» ўринбосарларига қарши ўтказади.