"Барселона" ҳимоячиси Жоау Канселу мураббийлари билан муносабатлари ҳақидаги саволга жавоб берди.

Португалиялик футболчи жорий мавсум охиригача "Барселона"га "Манчестер Сити"дан ижарага берилган. Кенг тарқалган маълумотларга кўра, футболчи "шаҳарликлар" сафини Хосеп Гвардиола билан муносабатлари кескинлашгани сабабли тарк этган, бироқ бу ҳеч бир томон томонидан тасдиқланмаган.

“Барча мураббийлар ўйинни турлича талқин қилишади. Мен Гвардиоладан жуда миннатдорман, чунки у мени яхшироқ ўйинчига айлантирди ва мен Хавидан ҳам миннатдорман, чунки ҳозир менда ишлар яхши кетмоқда ва мен "Барселона"да ўйнашни яхши кўраман. Мен ҳар доим бу клуб шарафини ифодалашни хоҳлаганман”, деди Канселу “Порту”га қарши ўйин олдидан матбуот анжуманида.