Қозоғистон ёшлар терма жамоаси бугун Ҳамдўстлик кубоги олдидан сўнгги назорат ўйинини ўтказди. Уларнинг рақиби Биринчи лига вакили — "Астана-1964" бўлди.

Ёшлар терма жамоаси бош мураббийи Сергей Боровский ушбу ўйинда Қирғизистонга қарши ўйинда қўлланиладиган комбинацияларни синовдан ўтказди. У футболчиларн 4-3-2-1 схемаси остида жойлаштирди ва Станислав Лунин ўткир ҳужумчи ролида ҳаракат қилди. Бауиржан Исламхан эса диспетчер вазифасини бажарди.

Биринчи бўлимда ҳисоб очилмаган бўлса, иккинчи бўлимда терма жамоа вакиллари устунликка эга бўлишди ва киритилган битта гол эвазига ғалаба қозонишди. Ягона голни захирадан майдонга тушган Евгений Левин "Астана-1964" дарвозасига киритди.

Эслатиб ўтамиз, Қозоғистон ва Ўзбекистон ёшлар терма жамоалари Ҳамдўстлик кубогининг "В" гуруҳида иштирок этишади.