Туркия футбол федерацияси ҳакамларга ҳужум содир бўлган тақдирда клубларга нисбатан санкциялар қўллашни режалаштирмоқда, деди мамлакат футбол федерацияси раҳбари Меҳмет Беюкекши.
Туркия чемпионатининг 15-туридан ўрин олган “Анқарагужу” – “Ризеспор” учрашуви душанба куни Анқарада бўлиб ўтди ва 1:1 ҳисобида якунланди. Ўйиндан сўнг "Анқарағужу" президенти Фарук Кожа бир неча киши ҳамроҳлигида майдонга югуриб чиқиб, ҳакам Ҳалил Умут Мелерни уриб, уни йиқитди. Ҳакам майдонда ётганида бир неча марта тепишган. Мелер касалхонага ётқизилган. Воқеа Туркия президенти Ражаб Тоййиб Эрдўғон томонидан қораланган. Сешанба куни Кожа истеъфога чиқди ва кечирим сўради.
"Туркиянинг олий адлияси ушбу воқеа учун масъулларга қарши зарур бўлган ҳамма нарсани қилди ва қилишда давом этади. Федерация сифатида биз қилишимиз керак бўлган ишни кеча юрист маслаҳатчимиз қилди. Интизомий кўрсатмаларимизда дисквалификациядан ташқари, қўшимча жазо чораларини ҳам жорий қилишни режалаштирганмиз ва бундай ҳолатлар такрорланмаслиги учун жарималар қўлланилади" - деди у матбуот анжуманида.
