Бугун "Севинч" жамоасида йил якунига бағишланган тадбир бўлиб ўтди.
Жорий мавсум "Севинч" қизлари учун том маънода унутилмас мавсумга айланди. Мавсум бошида жамоа Бухорода Жиззахнинг "Сўғдиёна-W" жамоасини 3:0 ҳисобида таслим этишди ва Ўзбекистон Суперкубогини қўлга киритишди. Жамоа Ўзбекистон чемпионатида бирорта ўйинда мағлубият ёки дуранг қайд этмасдан 66 очко жамғарган ҳолда ўн бешинчи бор Ўзбекистон Чемпионлигини қўлга киритишди. Тошкентда бўлиб ўтган Ўзбекистон Кубоги финалида Олмалиқнинг "ОКМК-W" жамоасини 3:0 ҳисобида мағлубиятга учратиб 12-марта мамлакат кубогини қўлга киритишди. "Севинч" 2023-йилда олтин "Хет-трик" қайд этди.
Бугун жамоа ютуқларига бағишланган байрам тадбири бўлиб ўтди. Кечада жамоа бош ҳомийси “Шўртан газ-кимё мажмуаси” бош директори Шуҳрат Асланов бу йилги футбол мавсуми ва киритилган ютуқлар билан жамоа аъзоларини табриклади. Қашқадарё вилояти ҳокимлиги номидан вилоят футбол ассоциацияси биринчи вице-президенти Шуҳрат Игамбердиев сўзга чиқиб, қизларни муборакбод этди. Кейинги сўз навбати “Насаф” жамоаси бош мураббийи Рўзиқул Бердиевга берилди. Рўзиқул Сагдуллаевич ҳам Владислав Хан бошчилигидаги қизларни қўлга киритилган ютуқлар билан табриклаб, кейинги мавсумда бундан-да катта ютуқларга эришишларини тилади.
Сўнгги сўз ўрнида жамоа бош мураббийи Владислав Хан яратиб берилган шарт-шароитлар учун клуб раҳбарияти ва ҳомийларга жамоа номидан миннатдорчилик билдириб, кириб келаётган янги йил билан барчани табриклади.
