Bugun "Sevinch" jamoasida yil yakuniga bag‘ishlangan tadbir bo‘lib o‘tdi.

Joriy mavsum "Sevinch" qizlari uchun tom ma’noda unutilmas mavsumga aylandi. Mavsum boshida jamoa Buxoroda Jizzaxning "So‘g‘diyona-W" jamoasini 3:0 hisobida taslim etishdi va O‘zbekiston Superkubogini qo‘lga kiritishdi. Jamoa O‘zbekiston chempionatida birorta o‘yinda mag‘lubiyat yoki durang qayd etmasdan 66 ochko jamg‘argan holda o‘n beshinchi bor O‘zbekiston Chempionligini qo‘lga kiritishdi. Toshkentda bo‘lib o‘tgan O‘zbekiston Kubogi finalida Olmaliqning "OKMK-W" jamoasini 3:0 hisobida mag‘lubiyatga uchratib 12-marta mamlakat kubogini qo‘lga kiritishdi. "Sevinch" 2023-yilda oltin "Xet-trik" qayd etdi.

Bugun jamoa yutuqlariga bag‘ishlangan bayram tadbiri bo‘lib o‘tdi. Kechada jamoa bosh homiysi “Sho‘rtan gaz-kimyo majmuasi” bosh direktori Shuhrat Aslanov bu yilgi futbol mavsumi va kiritilgan yutuqlar bilan jamoa a’zolarini tabrikladi. Qashqadaryo viloyati hokimligi nomidan viloyat futbol assosiasiyasi birinchi vise-prezidenti Shuhrat Igamberdiyev so‘zga chiqib, qizlarni muborakbod etdi. Keyingi so‘z navbati “Nasaf” jamoasi bosh murabbiyi Ro‘ziqul Berdiyevga berildi. Ro‘ziqul Sagdullayevich ham Vladislav Xan boshchiligidagi qizlarni qo‘lga kiritilgan yutuqlar bilan tabriklab, keyingi mavsumda bundan-da katta yutuqlarga erishishlarini tiladi.

So‘nggi so‘z o‘rnida jamoa bosh murabbiyi Vladislav Xan yaratib berilgan shart-sharoitlar uchun klub rahbariyati va homiylarga jamoa nomidan minnatdorchilik bildirib, kirib kelayotgan yangi yil bilan barchani tabrikladi.