"Реал" ҳозирда учта муҳим футболчисини хочсимон пайлар муаммоси ортидан йўқотди. Бу сафга сўнгги бўлиб Давид Алаба қўшилган эди. Бундан олдин дарвозабон Тибо Куртуа ҳамда ҳимоячи Эдер Милитао шу муаммо сабабли сафдан чиққанди. Айни дамда "қироллик клуби" сафида ҳимоячи муаммоси юзага келди. Алабанинг узоқ муддат майдонга қайта олмаслигини ҳисобга олсак, январь ойида янги футболчи сотиб олиш керак. Қуйида "Реал"нинг мудофаасини тўлдирадиган вариантлар келтирилади.
Қиммат вариантлар
Гонсалу Инасиу
Клуб: "Спортинг"
Ёш: 22
Нарх: 60 миллион евро
Кучли томони: чап-оёқ
Камчилиги: йӯқ
Football Manager ўйнайдиган мухлислар Инасиуни кўп танлашади. Негаки, у ёш ва ишончли. "Реал" эса бу факторларни кўздан қочирмайди. Тарихан мадридликлар Португалиядан яхши харидларни амалга ошириб келган. Пепе ва Милитао шулар жумласидандир. Бу сафар ҳам шундай иш қилиниши мумкин. Нишон эса "Спортинг" юлдузи Гонсалу Инасиу бўлади.
Жан-Клер Тодибо
Клуб: "Ницца"
Ёш: 23
Нарх: 45 миллион евро
Кучли тарафи: "Барселона"ни ёмон кўради
Камчилиги: баъзида қўпол хато қилиб туради
Кўпчилик томонидан Тодибога юқори баҳо берилмоқда. Балки у ҳам "Реал"га ўтиб, катта юлдузга айланар? Агарда Мадриддан таклиф келса, буни рад этиш жуда ҳам қийин бўлиши аниқ.
Эдмонд Тапсоба
Клуб: "Байер Леверкузен"
Ёш: 24
Нарх: 55 миллион евро
Кучли тарафи: бақувват
Камчилиги: тезлик
"Байер Леверкузен" ҳозирда Бундеслигада етакчи. Улар чемпион бўлишга интилмоқда. Шундай экан, муҳим фигуралар мавсум ярмида сотилмайди. Ўтган ёзда Тапсоба "Тоттенхэм"га ўтишига бир баҳя қолган эди. Аммо қишки трансферлар ойнаси раҳбариятга қизиқ эмас.
Арзон вариантлар
Рафаэль Варан
Клуб: "МЮ"
Ёш: 30
Нарх: 15 миллион евро
Кучли тарафи: "Реал"ни яхши билади
Камчилиги: яхши шерик керак
"Манчестер Юнайтед" янгиланмоқда. Бош мураббий Варанни режасига қўшмаётгани аниқ. Ҳимоячининг амалдаги битими 2024 йилда тугайди. Шу сабабли у январда арзонроққа бўлсада, сотилади.
Трево Чалоба
Клуб: "Челси"
Ёш: 24
Нарх: 15 миллион евро
Кучли тарафи: кетишга тайёр экани
Камчилиги: захирада узоқ вақт ўтириб қолган
Модомийки, "Бавария" Чалобани сотиб олмоқчи бўлса, нега "Реал" ҳам уриниб кўрмаслиги керак? Чалоба ёш ва тажрибали. Қолверса, у ЕЧЛ ғолиби ҳам саналади.
Келажак учун вариантлар
Лени Йоро
Клуб: "Лилль"
Ёш: 18
Нарх: 25 миллион евро
Кучли тарафи: аллақачон асосий таркиб аъзоси
Камчилиги: ҳали анча ёш
Октябрь ойидан бери "Челси", "МЮ" ва "Ливерпуль" Йоро билан боғлиқ вазиятни жиддий кузатиб келмоқда. Йоро каби, бир пайтлар Варан ҳам Франциядан келиб, "Реал"да порлаганди. Шундай экан, бу иш такрорланиши мумкин.
Йоррел Хато
Клуб: "Аякс"
Ёш: 17
Нарх: 30 миллион евро
Кучли тарафи: "Аякс" ёмон ҳолатда ва клубга пул керак
Камчилиги: кризис давридаги мағлублик зеҳнияти мавжуд бўлиши мумкин
17 ёш бўлишига қарамай, Йоррел Хато бу мавсумдаги ҳар бир баҳсда майдонга тушмоқда. У шу ёшидаёқ жамоага сардорлик қилади. Унинг "Реал"га кетиши олдинга босилган катта қадам бўлган бўларди.
ИСМАТОВ Ж.
