Ўзбекистон дарвозасига Россия ёшлар терма жамоасининг биринчи голини Дмитрий Каюмов киритди. Мезбонлар таркибида учрашувнинг энг яхши футболчиси деб топилган футболчи ўйин ҳақидаги фикрлари билан ўртоқлашди.

"Муносиб рақибга қарши жуда ҳам қийин ўйин ўтказдик. Ўзбекистон терма жамоаси бир неча йилдан бери бирга ўйнаб келади. Уларнинг сафида техник жиҳатдан кучли ўйинчилар кўп. Дарвозамиз дахлсизлигини сақлаб қолганимиз ва ўз имкониятларимиздан фойдаланганимиз яхши бўлди. Назаримда, бу мусобақадаги энг яхши ўйин бўлди. Гуруҳ босқичида бизда куч ва жипслик етишмади. Бу ўйин кўрсатдики, биз жамоа сифатида ҳаракат қила оламиз", дея таъкидлади Дмитрий.

"Спартак" клуби футболчисининг таъкидлашича, россияликлар Ўзбекистонга қарши чорак финалга баҳсига яхши ҳолатда етиб кела олишган.

"Мусобақа бошидагига нисбатан ҳозир кучимиз кўпроқ. Бир нечта ўйин ўтказганимиздан кейин янги кучларни йиғиб олдик. Шунингдек, бу ўйинга ҳам руҳий жиҳатдан яхшироқ чоғландик. Бугун жамоавий характер кўрсата олдик", дейди Каюмов.