Ўзбекистон терма жамоаси Қирғиз Республикасига қарши 2 хил таркиб билан ўйнашига қарамасдан, ортиқча қийинчиликсиз 4:1 ҳисобида ғалаба қозонди.

Терма жамоамиз ўйинни ўзи учун одатий 3-4-3 схемасида бошлади. Дарвозани Юсупов қўриқлаган бўлса, ҳимоя марказида Эшмуродов, Ашурматов ва Хамралиев учлиги ҳаракат қилишди. Чап қанотни Насруллаев, ўнг қанотни эса Турғунбоев эгаллади. Майдон марказида Ҳамробеков ва Холматов жуфтлиги тўп тепди. Ҳужум чизиғида чапда Файзуллаев, ўнгда Эркинов ва марказда Абдухолиқов майдонга туширилди.

2-тайм бошланишидан олдин 9 та ўзгартириш амалга оширилди ва терма жамоамиз 4-3-3 схемасига ўтди. Дарвозада Эргашев пайдо бўлган бўлса, чап қанотга Сайфиев, ўнг қанотга эса Абдирахматов туширилди. Фақатгина ҳимоя марказидаги Эшмуродов ва Ашурматов тандеми 1-бўлимдан сўнг алмаштирилмади. Майдон марказида Болтабоев, Искандеров ва Машарипов учлиги пайдо бўлди. Ҳужум чизиғида чапда Урунов, ўнгда Умаров ва марказда Амонов ҳаракат қилишди. 2-бўлим давомида Ғайбуллаев ва Бўриев ҳам майдонга туширилди. Ғайбуллаев бурчак зарбасидан сўнг боши билан гол уриш билан бирга, учрашув сўнггида 2-сариқ карточкани олиб майдонни тарк этди.

Умуман олганда, ўйин тўлиқ вакилларимиз назорати остида ўтди. Рақибларимизнинг ягона голи ҳам жарима зарбасидан кейин киритилди. Терма жамоа таркибида ўз дебютини ўтказишган Холматов, Хамралиев, Ғайбуллаев, Абдирахматов ва Бўриевларнинг барчаси ўзидан ижобий таассурот қолдиришди. Албатта, рақибнинг даражасини ҳам эсдан чиқармаслик лозим.

Жароҳатланган Шомуродов ўрнини ҳужум марказида ким эгаллаши ҳозирча номаълумлигича қолмоқда. Терма жамоанинг деярли барча позицияларида яхшигина рақобат юзага келган. Жумладан, вингерлар, марказий ҳимоячилар, чап қанот ҳимояси ва марказий ярим ҳимоячилар борасида танлов имконияти мавжуд.