O‘zbekiston terma jamoasi Qirg‘iz Respublikasiga qarshi 2 xil tarkib bilan o‘ynashiga qaramasdan, ortiqcha qiyinchiliksiz 4:1 hisobida g‘alaba qozondi.

Terma jamoamiz o‘yinni o‘zi uchun odatiy 3-4-3 sxemasida boshladi. Darvozani Yusupov qo‘riqlagan bo‘lsa, himoya markazida Eshmurodov, Ashurmatov va Xamraliyev uchligi harakat qilishdi. Chap qanotni Nasrullayev, o‘ng qanotni esa Turg‘unboyev egalladi. Maydon markazida Hamrobekov va Xolmatov juftligi to‘p tepdi. Hujum chizig‘ida chapda Fayzullayev, o‘ngda Erkinov va markazda Abduxoliqov maydonga tushirildi.

2-taym boshlanishidan oldin 9 ta o‘zgartirish amalga oshirildi va terma jamoamiz 4-3-3 sxemasiga o‘tdi. Darvozada Ergashev paydo bo‘lgan bo‘lsa, chap qanotga Sayfiyev, o‘ng qanotga esa Abdiraxmatov tushirildi. Faqatgina himoya markazidagi Eshmurodov va Ashurmatov tandemi 1-bo‘limdan so‘ng almashtirilmadi. Maydon markazida Boltaboyev, Iskanderov va Masharipov uchligi paydo bo‘ldi. Hujum chizig‘ida chapda Urunov, o‘ngda Umarov va markazda Amonov harakat qilishdi. 2-bo‘lim davomida G‘aybullayev va Bo‘riyev ham maydonga tushirildi. G‘aybullayev burchak zarbasidan so‘ng boshi bilan gol urish bilan birga, uchrashuv so‘nggida 2-sariq kartochkani olib maydonni tark etdi.

Umuman olganda, o‘yin to‘liq vakillarimiz nazorati ostida o‘tdi. Raqiblarimizning yagona goli ham jarima zarbasidan keyin kiritildi. Terma jamoa tarkibida o‘z debyutini o‘tkazishgan Xolmatov, Xamraliyev, G‘aybullayev, Abdiraxmatov va Bo‘riyevlarning barchasi o‘zidan ijobiy taassurot qoldirishdi. Albatta, raqibning darajasini ham esdan chiqarmaslik lozim.

Jarohatlangan Shomurodov o‘rnini hujum markazida kim egallashi hozircha noma’lumligicha qolmoqda. Terma jamoaning deyarli barcha pozisiyalarida yaxshigina raqobat yuzaga kelgan. Jumladan, vingerlar, markaziy himoyachilar, chap qanot himoyasi va markaziy yarim himoyachilar borasida tanlov imkoniyati mavjud.