"Тоттенхэм" бош мураббийи Анж Постекоглу Лондон клуби раҳбариятининг қишки трансферлар вақтида "Борнмут" ҳужумчиси Доминик Соланкени сотиб олиши тарафдори. Бу ҳақда Daily Mail хабар бермоқда.
Манбага кўра, Постекоглу 26 ёшли футболчини ўтган ёзда Лондон клубини тарк этган ҳужумчи Харри Кейннинг ўрнига узоқ муддатга ўринбосар сифатида кўрмоқда.
Аввалроқ, ОАВда "Тоттенхэм" Соланкени сотиб олиш вариантини кўриб чиқаётгани ҳақида маълумот пайдо бўлганди. Таъкидланишича, "шпорлар" скаутлари футболчининг муваффақиятини диққат билан кузатиб боришмоқда.
Эслатиб ўтамиз, Соланке Лондоннинг “Челси” клуби тарбияланувчиси ҳисобланади. Жорий мавсумда англиялик барча турнирларда 21 та учрашувда қатнашиб, 13 та гол ва битта голли узатмани амалга оширди. Футболчининг амалдаги клуби билан шартномаси 2027 йилнинг июнь ойи охиригача амал қилади. Transfermarkt порталига кўра футболчининг тахминий нархи 25 миллион еврони ташкил қилади.
