"Манчестер Юнайтед" марказий ҳимоячиси Рафаэль Варан Эрик тен Хаг жамоасидаги ролидан ҳафсаласи пир бўлди.
"Манкунианликлар" франциялик футболчини қишки трансфер ойнасида сотишга тайёр бўлган активларидан бири деб билишади. GFFN нашри хабар беришича, Вараннинг атрофидагилар Саудия Арабистони чемпионатига ўтиш эҳтимоли ҳақидаги маълумотни рад этишган.
Қайд этилишича, 30 ёшли ҳимоячи ўз "Ланс" клубига қайтишга тайёр. Бироқ франциялик футболчининг юқори маоши трансферга тўсқинлик қилиши мумкин.
Варан "Манчестер Юнайтед"да 2021 йилнинг ёзидан буён ўйнамоқда. Жорий мавсумда ҳимоячи “қизил иблислар” сафида барча турнирларда 15 та ўйин ўтказиб, битта гол урган. Футболчининг инглиз клуби билан шартномаси 2025 йилнинг июнь ойи охиригача амал қилади. Transfermarkt порталига кўра футболчининг тахминий нархи 25 миллион еврони ташкил қилади.
