Самарқанд шаҳрида ўтган шахматнинг блиц йўналиши бўйича жаҳон чемпионати ўз якунига етди.

Эркаклар ўртасидаги мусобақада яна Магнус Карлсен 21 имкониятдан 16 очко жамғарган ҳолда чемпионликни қўлга киритди. У 2 кун олдин рапид йўналишида ҳам чемпион бўлганди. Ўзи умуман Марказий Осиё давлатлари Магнус Карлсен учун жуда омадли бўлди. У ўтган йили Олмаота шаҳрида ўтган чемпионатда ҳам рапид ва блицда чемпион бўлганди.

Иккинчи ва учинчи ўринлар эса россиялик Даниил Дубов ва Владислав Артемьев банд этишди. Улар мос равишда 15,5 ва 15,0 очко тўплашди.

Ўзбекистонликлар орасида эса энг яхши натижани Шамсиддин Воҳидов қайд этди. У 12,5 очко билан 29-поғонани банд этди. Ҳамюртимиз 1500 доллар мукофот пулига эга бўлди.

Қолган ватандошларимиз эса мукофот пули бериладиган ўринларга кира олишмади. Нодирбек Ёқуббоев 12,5 очко билан 40-ўринни, Жавоҳир Синдаров 12 очко билан 49-поғонани ва Нодирбек Абдусатторов 11,5 балл билан 60-ўринни эгаллади.

Якуний учлик қуйидагича кўриниш олди:

1. Магнус Карлсен (Новегия) — 16 очко.
2. Даниил Дубов (Россия) — 15,5 очко
3. Владислав Артемьев (Россия) — 15,0 очко.

Аёллар орасида эса Валентина Гунина 14 очко билан блиц йўналишида жаҳон чемпиони бўлди. Кучли учлик қуйидагича кўриниш олди:

1. Валентина Гунина (Россия) — 12 балл
2. Александра Костенюк (Швейцария) — 11,5 балл
3. Жу Жинер (Хитой) — 10,5 балл.

Ҳамюртларимиз орасида Умида Омонова 9,5 очко билан 32-ўринни, Афрўза Ҳамдамова эса 7 очко билан 71-поғонани банд этди.