Испания кубогининг ярим финал дастлабки учрашувида мамлакатнинг икки етакчи клуби ўзаро рўбарў келганидан хабарингиз бор. Томонларнинг бу сафарги тўқнашувида ғолиб номи аниқланмади.
Учрашувнинг дастлабки бўлимида томонлар ҳужумлар билан асосий эътиборни эҳтиёткорликка ҳам қаратишганди. Биргина хато вазиятни бутунлай ўзгартириб юбориши мумкин эди. Шу боисдан ҳам биринчи бўлимда кўпроқ ҳимоячилар катта саҳнага чиқишди. Айниқса «Реал» ҳимоячиси Рафаэл Варан алоҳғида ажралиб турди. 19 ёшли футболчи фаолиятидаги энг яхши ўйинини ўтказди, десак муболаға бўлмас. Бир неча вазиятларда у жамоасини қутқариб қолди. «Барселона»да ўша эски жуфтлик Пике-Пуйоль тандеми ишончли ҳаракат қилиб биринчи бўлимда жамоаларнинг голсиз тарк этишига олиб келди.
Иккинчи бўлимни меҳмонлар ўта фаоллик билан бошлашди. Бунинг натижасида бўлимнинг 5-дақиқасида ҳимоячиларга ёрдамга келган Хосе Кальехоннинг хатоси натижасида Сеск Фабрегас каталонияликларни ҳисобда олдинга олиб чиқди.
Шундан кейин мезбонлар ҳужумга зўр беришди. «Барселона» эса қарши ҳужумларга эътиборни қаратди. Ана шундай вазиятларнинг бирида Педро ҳисобдаги фарқни иккитагача ошириши мумкин эди. Дарвозабон билан 50 метрча масофадан яккама-якка вазиятга чиқиб келган футболчи сўнгги зарбани ноаниқ йўллади.
Бутун ўйин давомида «Реал» ҳимоясидаги хатоларни бартараф этиб борган Рафаэл Варан 81-дақиқага келиб энди ҳужумда пайдо бўлди ва унинг бу юриши омадли чиқди. Месут Ўзил томонидан етказиб берилган жарима зарбасини барчадан баланд сакраган Варан Пинто қўриқлаётган дарвозага аниқ йўллаб ўртадаги фарқни йўққа чиқарди.
Сўнгги дақиқаларда Хорди Альба катлонияликларга ғалаба келтириши мумкин эди. Бироқ дарвозабон билан бирга-бир вазиятда бу сафар Альбанинг зарбасипни Диего Лопес бартараф этди.
Натижада ўйин жанговар дуранг билан ниҳоясига етди. Энди барча масалага «Камп Ноу»даги жавоб учрашуви ойдинлик киритиб беради.
Испания Кубоги
1/2 финал
Дастлабки учрашув
РЕАЛ МАДРИД – БАРСЕЛОНА 1:1 (0:0)
Голлар: Варан (81) – Фабрегас (50).
Реал Мадрид: Диего Лопес, Арбелоа, Карвалью, Варан, Эссьен, Алонсо, Хедира, Ўзил, Кальехон (Модрич, 58), Бензема (Игуаин, 63), Роналду.
Барселона: Хосе Пинто, Дани Алвес, Пуйоль, Пике, Альба, Фабрегас (Тиаго Алькантара, 85), Бускетс, Хави, Иньеста, Педро (Санчес, 76), Месси.
Огоҳлантиришлар: Пике (1), Карвалью (16), Кальехон (42), Дани Алвес (72), Пуйоль (81), Алонсо (90).
