Бир ҳафтадан бери давом этаётган Қашқадарё вилояти ҳокими кубоги баҳслари ҳам ниҳоясига етиб қолди. Гуруҳ баҳсларида ишончли ўйин намойиш этган “Насаф” ўринбосарлари бугун ярим финалнинг илк учрашувида Нишоннинг “Нуристон” жамоасига қарши майдонга чиқишди.

Учрашув бошидаёқ Баҳодир Аннаматов шогирдлари ташаббусни ўз қўлларига олишди ва бўлимнинг биринчи ярми ортда қолмасдан туриб икки тўп фарқи билан олдинги чиқиб олишди. Дастлаб Жавоҳир Ашуров дарвозабон ва ҳимоячининг хатосидан кейин тўпни дарвозабоннинг устидан ошириб тўрга йўллаган бўлса, орадан кўп ўтмай Дониёр Нарзуллаев ҳисобни 2:0 га етказди.  Биринчи бўлимнинг сўнгги дақиқаларида нишонлик футболчилар орадаги фарқни қисқартиришди.

Иккинчи бўлимда Динмуҳаммад Қурбонназаров мураббийлигидаги нишонлик футболчилар ҳисобни тенглаштириш илинжида бор кучлари билан олдинга ўтишди. Ҳисобни тенглаштириш учун бир қатор имкониятларга эга бўлишди. Аммо ҳал қилувчи зарбани беришда уларга бироз омад етишмади. Натижада қийин баҳсда муҳим ғалабага эришган ёш насафчилар эртага финал беллашувида мусобақа ғолиблиги учун майдонга чиқишади.

Ҳоким кубоги. Ярим финал.
"Насаф" (ёшлар) - "Нуристон" - 2:1
“Насаф”: Элдорбек Суюнов, Илҳом Усубжонов, Одил Ҳамробеков, Тоҳир Абдураззоқов, Сардор Холмуродов, Жавоҳир Ашуров, Нодир Санақулов, Нажмиддин Нормуродов, Жамол Машарипов, Азиз Маликов, Дониёр Нарзуллаев.
Захирадан майдонга тушганлар: Темур Юмангулов, Обид Маматов, Сирож Абдуҳакимов, Улуғбек Дадабоев.

Эртага футболчиларимиз финал беллашувида “Машъал” футболчилари билан куч синашишади. Муборакликлар ярим финалда “Шўртан” ўринбосарларини кичик 1:0 ҳисобда мағлуб этишди.