ФИФА талқини бўйича 2023 йилги энг яхши совринни топшириш маросими якунланди. “Интер Майами” ҳужумчиси Лионель Месси йилнинг рамзий терма жамоасига киритилди. Шу тариқа, аргентиналик футболчи фаолияти давомида 17-марта сайёрамизнинг энг яхши 11 нафар футболчиси рўйхатига киришга муваффақ бўлди. 36 ёшли футболчи 2007 йилдан бери доимий равишда ФИФА юлдузлар жамоасига киритиб келинмоқда.
Эслатиб ўтамиз, Месси 2023 йилда France Football нашрининг "Олтин тўп" совринини ҳам қўлга киритган ва бу унинг фаолиятидаги саккизинчи бўлганди. Лионель ўтган йил “ПСЖ” билан Франция чемпиони бўлди, Франция Суперкубогини қўлга киритди ва “Интер Майами”га клуб тарихидаги илк соврин – Лига кубогини олиб келди.
