Ўтган мавсумнинг иккинчи ярмини «Қизилқум»да ўтказган Павел Леус янги чемпионатни «Шўртан»да бошлашга яқин турибди. У куни кеча жамоа қароргоҳига етиб келиб, машғулотларда иштирок этишга улгурди. Биз жамоа устози Эдгар Гессдан литвалик дарвозабон ҳақида сўраганимизда мураббий шундай деди:

«Мен Леусни анчадан бери яхши биламан, у билан олдин ҳам бирга ишлаганмиз. Жамоамизни Михаил Наумов тарк этганидан сўнг дарвозабонга эҳтиёж сезаётгандик. Ўйлайманки, Леуснинг келиши бўш ўринни ёпади. У билан тез орада шартнома тузишни мўлжаллаяпмиз».

Эслатма: Павел Леус ўтган мавсум «Қизилқум» сафида 12та ўйинда майдонга тушиб, 23та гол ўтказиб юборди.

«Шўртан»нинг Ғузордаги машғулотларига кечадан бошлаб яна бир янги футболчи қўшилди. Бу – ҳимоячи Шавкат Раимқулов. 2012 йилни «Насаф» таркибида ўтказган ушбу футболчи аввал ғам ғузорликлар сафида тўп тепганди. У ўз омадини яна бир бор шу жамоада синаб кўришга қарор қилди. Бизга маълум бўлишича, Раимқуловнинг ҳам тез кунларда «Шўртан» билан шартнома тузиши кутилмоқда.

Эслатиб ўтамиз, Раимқулов шу йилнинг январь ойида дастлаб «Олмалиқ», сўнгра «Нефтчи» сафида шуғулланди. Кейин эса Ғузорга йўл олди. Ушбу футболчи ўтган йил олий лигада жами 15 та ўйинда майдонга тушган.