Ўзбекистон миллий терма жамоаси Осиё кубоги гуруҳ босқичи 3-тури доирасида қийин ўйин ўтказди. Кучли рақибларга қарши бўлажак ўйин олдидан бу яхши спарринг бўлди, аммо ўйинда баъзи йўқотишлар таъбни хира қилди.

Биринчи бўлим сўнгида ҳакам дарвозамиз томон адолатсиз пенальти белгилади. Ўша вазиятда Ҳамробеков ерга йиқилаётганида тўп Одилнинг қўлига тегди, аммо бунинг оқибатида тўпнинг йўналишини ўзгартирмаган, австралияликлар ҳужумни давом эттириб, зарба йўллашга ҳам улгуришганди. Пенальтини эса Мартин Бойл голга айлантирди.

Сречко Катанец иккинчи бўлимда қанот футболчилари ва ҳужум чизиғига ўзгаришлар киритди. Тажрибали Жалолиддин Машарипов чап қанотда бир ҳимоячини чалғитиб, дарвоза яқинига узатма берди. Турғунбоев эса баланд сакраганча тўпни дарвозага жойлаб, ҳисобни тенглаштирди — 1:1.

Терма жамоамиз мазкур дуранг туфайли ўз очколарини 5 тага етказди ҳамда "B" гуруҳида 2-ўрин билан плей-оффга чиқди. Терма жамаоамиз нимчорак финалда "F" гуруҳида 2-ўринни эгаллаган жамоа билан тўқнаш келади. Бу кўп эҳтимол билан Таиланд ёки Ўмон бўлади.

Захирадан майдонга тушган Игорь Сергеев жароҳат олгани бироз хавотирга солди. Умид қиламиз, унинг жароҳати жиддий бўлиб чиқмайди.

Осиё кубоги. «B» гуруҳи, 3-тур
АВСТРАЛИЯ - ЎЗБЕКИСТОН - 1:1 (1:0)
Голлар: Мартин Бойл (45+1-пенальти) — Азиз Турғунбоев (78)
Огоҳлантиришлар: Суттар (50), МакГри (70) — Умар Эшмуродов (25), Одил Ҳамробеков (45), Отабек Шукуров (45+3) 
Австралия: Мэтью Райан, Натаниел Аткинсон (Льюис Миллер 90+3), Кье Роулс, Харри Суттар, Азиз Бехич, Рилей Макгри (Бруно Форнароли 83), Кену Баккус (Айден О'Нилл 83), Жексон Ирвин, Жордан Бос (Марко Тилио 90+3), Кусини Йенги, Мартин Бойл (Коннор Меткалф 72)
Ўзбекистон: Ўткир Юсупов, Зафармурод Абдураҳматов, Абдулла Абдуллаев, Умар Эшмуродов, Рустам Ашурматов, Фарруҳ Сайфиев, Ҳожимат Эркинов (Азиз Турғунбоев 63), Одил Ҳамробеков, Отабек Шукуров, Остон Ўрунов (Жалолиддин Машарипов 46), Аббос Файзуллаев (Игорь Сергеев 63; Жамшид Искандеров 84)