Испаниянинг «Santillana» луғатига ўзаги «Барселона» футбол клуби ва Аргентина терма жамоаси ҳужумчиси Лионель Мессининг фамилиясидан ташкил топган сифат туркумига оид «inmessionante» сўзи киритилди. Бу ҳақда Испаниянинг «El Mundo Deportivo» нашри хабар бермоқда.
Янги сўз икки хил маънога эга: 1) Мессининг ўйин услуби, ўзини чексиз мукаммаллаштириш қобилияти; 2) барча даврлардаги энг яхши футболчига бериладиган таъриф.
Мессининг ўйинини таърифлаш учун алоҳида сўз кераклиги ҳақида илк бор Аргентина терма жамоаси бош мураббийи Алехандро Сабелья тўхталиб ўтганди. Мураббий бу ҳақда 2012 йилнинг октябрь ойида, Месси иккита гол урган ва аргентиналиклар 3:0 ҳисобида ғалаба қозонган Уругвай қарши ўйиндан сўнг фикр билдирган эди.
Кўп йиллардан бери Месси билан ҳамкорлик қилиб келадиган Pepsi компанияси Мессининг ўйинини таърифлайдиган сифат туркумига оид сўзни ўйлаб топиш бўйича ижтимоий тармоқларда махсус тарғибот кампаниясини ташкил этган эди. Таклиф этилган вариантлар орасидан энг яхшисини Сабелья танлаши керак эди, мураббийга эса кўпроқ inmessionante сўзи маъқул келди.
Янги испанча сўз киритилган «Santillana» луғати «Pepsi» кўмаги асосида нашр этилади.