Aлиризо Фағонийнинг Ироқ тўпурари Aйман Ҳусайнни четлатгани баҳс-мунозараларга сабаб бўлаётганди. Ироқ футбол федерацияси бу бўйича ОФКга шикоят ҳам йўллади!

Шу сабабдан, ушбу шикоят кўриб чиқилмагунга қадар ҳакам Осиё кубоги ўйинларига ортиқ тайинланмаслиги айтилганди. ОФК ушбу вазият борасида ўз хулосасини эълон қилди ва унга кўра, Фағонийнинг 2-сариқ карточкани кўрсатгани тўғри деб топилди.

ИФAБ томонидан ишлаб чиқилган "Футбол қоидалари"нинг 12-бандига асосан, голдан сўнг ўйинни қайтадан бошланишини чўзиш сариқ карточка билан жазоланиши лозим.

Aйман урган голини нишонлаш пайтида ҳакам томонидан 3 бора оғзаки огоҳлантирилган ва шундан сўнг унга иккинчи сариқ карточка кўрсатилган.