"Интер Майами" МЛСнинг иккинчи энг қиммат франшизасига айланди, деб хабар беради Forbes. Нашрнинг ёзишича, клуб қиймати ўтган йилга нисбатан 72 фоизга ошган ва ҳозирда 1,03 миллиард долларни ташкил этмоқда. Маълум қилинишича, бу ўсишнинг асосий сабаби “Интер Майами” раҳбарияти томонидан аргентиналик ҳужумчи Лионель Месси билан шартнома имзолагани бўлган.
Хабар қилинишича, “Интер Майами” Forbes талқинига кўра, лига тарихидаги 1 миллиард долларга баҳоланган иккинчи клуб бўлди. Аввал “Лос-Анжелес” 2023 йилда бу маррага эришган ва 1,2 миллиард доллар даромад билан МЛСнинг энг қиммат жамоаси бўлиб қолмоқда.
36 ёшли аргентиналик ҳужумчи Лионель Месси 2023 йилнинг июл ойида эркин агент сифатида "Интер Майами"га ўтган эди. Месси янги жамоаси сафида 14 та ўйинда 11 та гол урди ва 5 та голли узатмани амалга оширди.
