Нимадир ёзгим келяпти-ю лекин мияга тузукроқ фикр ҳам келмаяпти.

Ягона келаётган нарса бу,  доимгидак футболчиларимизни руҳан синдириб қўймаймасак бўлди деган фикр. Бу нарса қўлимиздан жуда яхши келади.

Қанчадан қанча футболчиларимизни шундай қилиб йўқотдик. Эскитдан қолган сарқитдан воз кечиш вақти келди.

"Биз араблардан доим кучли бўлганмиз, уларни бемалол ютишимиз керак" деган эртаклардан ҳам воз кечиш керак. Доим шунақа деб юрадиган мураббийимиз ЖЧ саралашида энг ёмон натижамизни қайт этиб берди охирги ЖЧ саралашида. Унинг устига биз амалдаги Осиё  чемпионига қарши унинг майдонида ўйнадик.

"Катанец кетиши керак" деган гапларга ҳам қўшилмайман.  Ундан олдинги мураббийларнинг  жамоаларини  эсланг. Биттаси араблардан учталаб еб юрди. Яна биттаси 11 киши бўлиб ҳимояланидиган футбол ўйнайдиган бўлди.

Тўғри, Катанец жамоаси идеал эмас. Лекин¸ бу жамоада ғалаба руҳияти бор, ютқазишни хоҳламайдиган характер бор. Жанговарлик руҳи бор. Тактика бор. Фикрлаш бор. Шунча етакчиларнинг  жароҳатига қарамасдан шундай ўйинлар кўрсатишганини ўзи таҳсинга лойиқ.

Ўзимиздан эксперт ёқиб олиб "ундай қилишимиз керак эди, бундай қилишимиз керак эди" дейишимиз мумкин. Лекин¸ ўша қилишимиз мумкин бўлган ишлар ҳам ишлаши аниқ эмас эди.

Оддий мисол кўп мураббийлар пенальтини машқ қилмайди. Сабаби жамоа руҳияти ўйинда шунга мослашади ва жамоа пенальтига обориш учун ўйнайди. Шунинг учун айрим мураббийлар машқ қилишмайди.

Қолаверса, машқ бошқа, босим остида амалга ошириш бошқа. Мана,  Машарипов доим машғулотлардан сўнг пенальти тепишни машқ қилганини айтган. Амалда эса ўхшамади.

Нима бўлганда ҳам, футболчиларни камситадиган, устидан куладиган, ҳақорат қиладиган масхарабозликни йиғиштириш керак.

Ҳеч қайси футболчи мағлуб бўламан деб ўйнамайди. Футболчилар сизларни хурсанд қилиш учун, ватан шаъни учун ҳаракат қилишди. Деярли 1 ойга яқин ажойиб ҳиссиётларни улашишди. Бу учун уларга раҳмат айтиш керак  ва ҳар хил ҳақоратларга эътибор бермасдан ЖЧ йўлида ҳаракатни давом этиришларини тилаб қолиш керак.

Равшан Салимов.