Бельгия терма жамоаси бош мураббийи Доменико Тедеско Миллатлар лигасига қуръа ташлаш натижаларига баҳо берди.
“Ёмон ёки яхши жуфтликларми? Бу фақат сизнинг тахминларингизга боғлиқ. Шахсан мен қуръадан мамнунман.
Бу турнирда ҳар доим кучли рақиблар бўлади ва биз буни билардик. Бизда Евро-2024 дан кейин энг яхши жамоаларга қарши ўйнаш учун яхши имконият бўлади.
Мақсадимиз рақиб ким бўлишидан қатъи назар, ғалаба қозониш. Франция терма жамоаси жуда кучли, бу жамоада, ҳаттоки, захира ўриндиғида ҳам яхши ўйинчилар кўп.
Италияга келсак, бу жамоа билан бўлажак ўйинлардан хурсандман, чунки у ерда менинг оилам яшайди. Бу мен учун алоҳида нарса", - дея Тедесконинг сўзларини келтиради Football Italia.
Эслатиб ўтамиз, Белгия терма жамоаси Миллатлар лигасининг 2024/2025 йилги мавсумида Франсия, Италия ва Исроил терма жамоалари билан бир гуруҳдан жой олади.
