Ўзбекистон кубоги соҳиби — "Бунёдкор" бугун ўзининг Туркиядаги иккинчи назорат ўйинини ўтказди. Қосимов шогирдларига Максим Шацких тўп сураётган Одессанинг "Черноморец" клуби рақиблик қилди.

Ўйин тенгкурашлар остида кечди, ҳеч бир жамоанинг устунлиги сезилмади. Учрашувда хавфли вазиятлар у қадар кўп бўлмаса-да, дарвозабонлар безовта қилиб турилди. Ўйинда киритилган ҳар иккала гол иккита бўлимнинг сўнгги дақиқаларида дарвозалардан ўрин олди. Биринчи бўлим сўнгида Бакай 25-30 метрлардан белгиланган жарима тўпини чиройли тарзда Нестеров қўриқлаётган дарвозага йўллади.

Иккинчи бўлимда "қалдирғочлар" кўпроқ тўп билан муомала қилишган бўлса, одессаликлар қарши ҳужумда ҳаракат қилишди. Асосий вақтнинг сўнгги дақиқасида захирадан майдонга тушган Олег Зотеев вакилларимизни мағлубиятдан қутқариб қолди. Унинг 20 метрлар чамасидан йўллаган зарбаси дарвоза "тўққизлиги"га бориб тушди. Ҳисоб — 1:1. Бу ўйинда Максим Шацких майдонга туширилмади.

3 кун аввал "Черноморец" ва Ўзбекистоннинг яна бир клуби "Пахтакор" ўртасидаги баҳс ҳам айнан 1:1 ҳисобида якунланганди. "Бунёдкор" эса бугун куннинг биринчи ярмида Беларусь вице-чемпиони — "Шахтёр"ни 4:2 ҳисобида мағлуб этганди.

Назорат ўйини
"Бунёдкор" - "Черноморец" (Украина) - 1:1
Голлар: Олег Зотеев (90) — Бакай (45+1)
Огоҳлантиришлар: Жўраев (8) — Бакай (45)
Четлатиш: Политыло (90)
«Бунёдкор»: 1. Нестеров, 4. Каримов, 6. Ғофуров, 16. Филипосян, 23. Жўраев (Олег Зотеев 46), 13. Тўраев, 18. Мусаев, 19. Ҳасанов, 28. Марко, 10. Саломов, 17. Мурзоев.
«Черноморец»: 12. Безотосный, 29. Фонтанельо, 2. П.Ковальчук, 42. Зубейко, 22. Сантана, 89. Политыло, 11. Бобко, 6. Де Матос, 23. Жа Жеже (Бурдужан 76), 99. Риера, 19. Бакай.
Бош ҳакам: Февзи Уйғун (Туркия)