"Жирона"да ижара асосида ўйнаётган "Труа" вингери Савио ёзги трансферлар ойнаси бошида расман "Манчестер Сити" футболчисига айланади. Бу ҳақда журналист Фабрицио Романо ижтимоий тармоғида хабар берди.
Манба берган хабарга кўра, 19 ёшли ҳужумкор футболчи 1 июль куни "шаҳарликлар" сафига қўшилади. Шундан сўнг Савио "шаҳарликлар" бош мураббийи Пеп Гвардиола бошчилигидаги янги жамоада мавсумолди машғулотларини бошлайди. "Манчестер Сити" футболчининг трансфери учун "Жирона"га эмас, Франциянинг "Труа" клубига пул тўлайди.
Жорий мавсумда Савио “Жирона” сафида барча мусобақаларда 30 та ўйинда майдонга тушиб, 7 та гол ва 7 та голли узатмага муаллифлик қилган. Футболчининг "Труа" билан шартномаси 2027 йилнинг июнь ойи охиригача амал қилади. Transfermarkt порталига кўра футболчининг тахминий нархи 30 миллион еврони ташкил қилади.
