Тошкентнинг “Бунёдкор” футбол клуби делегацияси Япония пойтахти Токио шаҳрида жойлашган Нарита халқаро аэропортига етиб борди.

“Қалдирғочлар” Тошкент вақти билан соат 16:30да Токио-Хиросима йўналиши бўйича иккинчи парвозни амалга оширишди ва Хиросима шаҳрига етиб келди. “Қалдирғочлар” Хонсю оролидаги “Fukuyama New Castle Hotel” меҳмонхонасига жойлашишди. Эртага жамоамиз аъзолари Япониядаги биринчи машғулотларини ўтказишади.

Дарвоқе, шанба куни Токиодаги олимпийский стадионида Япония суперкубоги финали бўлиб ўтади. Унда Япония чемпиони ва рақибимиз – “Санфречче Хиросима” клуби Император кубоги соҳиби – “Кашива Рейсол” жамоасига қарши майдонга тушади. Учрашув маҳаллий вақт билан соат 13:35да (Тошкентда 08:35 бўлади) бошланади. Ушбу имкониятдан албатта “Бунёдкор” мураббийлари унумли фойдаланишиб, рақибни синчковлик билан ўрганиб чиқишади.

Эслатиб ўтамиз, Осиё Чемпионлар лигаси биринчи тури доирасидаги “Санфречче Хиросима” – “Бунёдкор” учрашуви 27 февраль куни маҳаллий вақт билан 19:00да (Тошкентда 15:00 бўлади) бошланади.

Мирзаҳаким Тўхтамирзаев,
Токио - Хиросима - Фукуяма