Туркияда ўқув-йиғин машғулотларини якунлаб, уч кунлик таътилдан кейин қаршилик футболчилар кеча клуб қароргоҳида тўпланишди.

Кечга яқин жамоамизнинг илк машғулоти “Насаф” (олдинги “Меҳнат) стадионида ўтказилди. Дастлаб жисмоний машқлар бажарилгач, машғулотларнинг иккинчи ярмида жамоа аъзолари икки гуруҳга бўлинган ҳолда ўзаро тўп тепишди.

Жамоанинг етакчи футболчиси Артур Геворкян яқин кунларда сафга қўшилса, марказий ҳимоячи Мақсуд Каримов бироз бетоблиги боис машғулотларда иштирок этмади. Ўтган йили жарроҳлик столига ётқизилган ҳимоячи Шерзод Каримов айни пайтда индивидуал тарзда машғулот ўтказмоқда.

Жамоа аъзолари мавсум бошлангунига қадар Қаршида тайёргарлик кўришади. 25 февраль куни эса Жиззахнинг “Сўғдиёна” жамоаси билан назорат учрашуви ўтказилиши режага киритилган.